Телма дознава дека телото на Мемет Камбер е предадено на најблиските, а погребот ќе биде извршен денеска во 14 часот.
Во меѓувреме, во тек е истрага во Јавното обвинителство, а за сите кривични дела за коишто постои сомнеж дека се сторени ќе има одговорности, тврди министерот за внатрешни работи Оливер Спасовски, откако ДНК-анализите открија кои се вистинските родители на 19-годишниот Мемет Камбер кој почина без лична карта и лекарска книшка, целосно отфрлен од системот.
Телма вчера информираше дека ДНК-анализата е завршена, резултатите се ставени на хартија и веќе се испратени во институциите. Идентификациската мистерија е разоткриена – кој е и што е, во случајот со Мемет Камбер.
Три недели поминаа од смртта на деветнаесетгодишното момче. Бирократијата и административните процедури сѐ уште не дозволуваат да почива во мир Камбер. Тој за системот бил анонимус и додека беше жив.
Имал извод, имал државјанство, но не и лична карта. Мајката на Мемет чиешто име е наведено во изводот, всушност не е неговата вистинска мајка, туку е негова тетка.
