Кој ги врти парите во делкругот на огласите. Какви се приходите на компаниите кои им служат на граѓаните кои сакаат да огласат на продажба свои производи? Еден брз преглед на податоците на Централниот регистар покажува дека овие компании се за пофалба иако официјално се дел од „малите компании“ во земјава, сепак, нивните приходите воопшто не се за потфрлање.
Споредба меѓу „Реклама 5“ и „Пазар3“ покажува дека компаниите остваруваат висок профит, особено едната од нив. Но, да ги видиме деталите.
Бројките покажува дека финансиските податоци за „Реклама5“, или како што е официјалното име „Друштво за услуги производство и трговија БИГМЕДИА ДООЕЛ увоз – извоз с. Радолишта Струга“, со регистрирана дејност Односи со јавноста и дејности на информирање, која влегува во мали компании и чија сопственост е приватна, минатата година има навистина „импресивни“ резултати.
Имено во 2022 година компанијата успеала да инкасира дури 13.045.781 денар, при што имала раст од дури 13 проценти. Ова се вкупните приходи на „Реклама5“.
Компанијата минатата година имала неполни три милиони денари расходи, или поточно 2.909.154 денари, каде исто така има раст од 23 отсто. Она што најмногу привлекува внимание е што фирмата, за која официјално е напишано дека брои само еден вработен, успеала да оствари добивка од скоро 150 илјади евра, или поточно 9.122.964 денари.
Што велат податоците за „Пазар3“, уште една компанија која е позната токму по огласите кои можат граѓаните да ги постават и со кои најчесто сакат да отуѓат некој свој имот. Па така, „Друштво за посредување и услуги ПАЗАР3.КОМ ДООЕЛ, увоз-извоз Ресен“, чија официјална дејност е посредување во трговија со разновидни производи, кое исто така во приватна сопственост и кое влегува во мала компанија, сепак има 15 вработени. „Пазар3“, лани успеала да оствари 10.742.513 денари приходи, при што имала пад од 18 проценти.
Нивните расходи достигнале 8.796.591 и таму имаат намалување од 27 отсто. Вкупната добивка за минатата година на оваа компанија била 1.625.189 денари или 26 илјади евра.
Фактор.Мк
