Претставниците на Владата на Србија, репрезентативните синдикати и работодавачите на денешниот состанок на Социјално-економскиот совет (СЕС) не постигнаа договор за минималната плата за 2024 година. Се очекува Владата да го потврди предлогот минималната плата од 40.000 динари колку што е годинава да се зголеми на 47.154 динари.
– Одлуката за висината на минималната плата во Србија за следната година ќе биде донесена на седницата на Владата на Србија на 14 септември, а предлогот на Владата е минималната плата да се зголеми за 17,8 отсто на 47.154 динари, т.е. 401 евро, изјави денеска министерот за финансии Синиша Мали.
Потпретседателот на Сојузот на независни синдикати на Србија (СССС) Горан Милиќ по седницата на СЕС за Бета изјави дека министерот за финансии Синиша Мали на седницата на СЕС изјавил дека параметрите врз основа на кои Министерството направило анализа за зголемувањето на минималната плата биле „оправдани“.
– Сметаме дека нашите барања се реални бидејќи мајската потрошувачка кошничка чинела речиси 52.000 динари (443 евра), а трошоците за минималната кошничка со намирници значително ќе се зголемат до јануари следната година, рече Милиќ.
Тие предложија овој септември минималната плата да се зголеми за десет отсто, а во јануари 2024 година за нови 20 отсто, но Министерството за финансии на претходните две средби одби да разговара за зголемувањето што ќе се применува годинава.
