Сопственикот на порталот „Доказ М“, Марјан Стаменковски кој е осуден со правосилна судска пресуда од две години и шест месеци затвор е на слобода. Управата за извршување на санкции му дала прекин на казната од 30 дена.
Дека Стаменковски е на слобода за „Фокус“ потврди Јовица Стојановиќ, кој на нашето прашање кое е образложението за прекин на казната ни одговори кратко „согласно закон, за здравје“.
На нашите дополнителни прашања според кој член од законот, тој ни одговори според Законот за извршување на санкциите, без да каже според кој член со образложение дека за здравје не се коментирало. Други детали Стојановиќ не сакаше да каже.
Според информациите од Кривичниот суд, за прекин на казната од 30 дена, Управата нема обврска да го извести Кривичниот суд и да бара дозвола од Судија за извршување на санкции. Според нашите информации, за ова не било консултирано ниту обвинителството.
Стаменковски прекинот на казната го добил иако против него има и активна предистрага, која се очекува да открие кој го плаќал и кој ги нарачувал текстовите со навредлива содржина кои ги објавуваше.
Сопственикот на Доказ, иако според пресудата имаше забрана за вршење на професија и регистрирани домеини, сепак тој преку своите блиски продолжи со објавување на текстови на други сајтови, однoсно текстовите со навредлива содржина воопшто и не запреа.
