Полицијата не открива што се случува со петмината приведени под сомнение за поврзаност со исчезнувањето на четиринаесет годишната Вања Ѓорчевска од Скопје. Согласно законот, во рок од 24 часа тие мора да ги изведат пред судија на претходна постапка, кој би одлучил дали ќе одреди мерки за претпазливост, како затворски притвор, одземање пасош, домашен притвор или други мерки со кои ќе се ограничи нивното движење или пак, доколку немаат доволно докази против нив, да ги ослободат. На прашањето на Алфа, каде во моментов се петмината приведен, од МВР не ни одговорија, во една реченица информираат само дека работат на расчистување на случајот.
„СВР Скопје интензивно работи на расчистување на случајот. По расчистувањето, соодветно ќе ја информираме јавноста – велат од МВР.
Како од Министерството за внатрешни работи, така и од јавното обвинителство решија само кусо да и одговорат на Алфа без споделување на повеќе детали дека постапката уште била во рацете на полицијата.
„Постапката се уште е во фаза на полициска истрага. Кога ќе има повеќе информации, ќе ги сподлеиме со вас.“ – Ни одговорија од ОЈО.
Во моментов исто така не е јасно дали е извршен претрес во нивните домови. Со наредба од суд, полицијата може да изврши пребарувања на домовите, возилата или други места поврзани со приведените лица за да се најдат докази кои би можеле да бидат клучни во истрагата. Министерот Спасовски вчера објави дека запленет е еден автомобил поврзан со исчезнувањето на Вања, кој во моментов се вештачи.
Досега, во рамки на истрагата за пронаоѓање на Вања Ѓорчевска, во околината на центар се пребарани сите подруми, сослушани сведоци, прегледани се видеа од 50 камери, следен е сигналот на телефонот, пребарани се манастири, како и коритото на реката Вардар, а истрагата продолжува.
Инаку, 14 годишната Вања Ѓорчевска е висока 175 сантиметри, со кафени очи и темно кафена коса. Носи протези за заби и има бемка на десната страна од лицето. Исчезна во понеделникот во утринските часови на пат кон училиштето Песталоци.
