Адвокатот на Беким Незири, Еленко Миланов вели дека неговиот клиент не учествувал во инцидентот во М-НАВ и немал апсолутно никаков придонес во случајот.
Како што вели, целиот настан се случил зад неговиот грб.
Адвокатот вели дека не е точно дека инцидентот се случил во кулата за контрола на летање, ниту пак дека биле нападнати контролори кои во моментот работеле.
„Во овој настан ниту има нешто што се случило во контролната структура, ниту има нешто што се случува во близина на таа контролна кула, ниту, пак, со лице коешто во тој момент требало да извршува свои обврски во контролната кула. Тоа е првото и основно што ја направи оваа фама и разногласие“, изјави Миланов од пред Кривичниот суд.
Тој објасни дека со денешното појавување пред судот, Незири покажува дека нема намера да бега, туку дека сака да докаже што точно се случило во М-НАВ.
