Жителите на Чашка продолжија таму каде што застанаа кон крајот на ноември минатата година и во првите два дена од второто полугодие, протестирајќи против отворањето паралелка на албански јазик во основното училиште „Тодор Јанев“, за денеска повторно да зовријат страстите по „блиската средба“ со органите на редот.
Триесетина демонстранти се (с)кошкаа со уште толку полицајци во обидот да ги спречат наставниците да влезат во училиштето, а на една жена притоа ѝ се слоши и интервенираше Брзата помош.
Второто полугодие не е почнато поради „незаконско воведување паралелка на албански јазик во училиштето, незаконско назначување на в.д директорката Елена Николова и незаконски огласи за вработувања“, како што објаснуваат учесниците во протестот.
„Не мрзневме два и пол месеца за сега да попуштиме. Поднесовме претставки секаде, се обративме до сите институции, никој не нѐ слуша ниту презема мерки“, изјави Цвета Пешевска, претседателка на Советот на родители во ОУ „Тодор Јанев“, за Радио Слободна Европа.
Во училиштето нема настава од 22 ноември, кога родителите почнаа да протестираат, а учениците да губат часови, но проблемот е од август 2023 година, кога Министерството за образование и наука му ги одзеде ингеренциите врз училиштето на градоначалникот на Чашка, Горан Стојановски, и наложи да се отвори паралелка на албански јазик за неколку првачиња.
