Moјот план е во вториот изборен круг од претседателските избори да ја победам Гордана Силјановска Давкова, изјави лидерот на ЗНАМ-За наша Македонија и градоначалник на Куманово, Максим Димитриевски во интервју за ТВ Сител. Тој ваков одговор даде на прашањето за кого ќе ги повика своите поддржувачи да го дадат својот глас во вториот изборен круг доколку тој не помине – дали за Стево Пендаровски или за Гордана Силјановска Давкова.
На тоа прашање Димитриевски претходно објасни дека не е ниту морално ниту етички прифатливо да повиква некого некому да дава глас и потенцира дека ЗНАМ не тргува со гласови. Воедно, како што претходно рече, на парламентарните избори нема да победат ниту СДСМ, ниту ВМРО-ДПМНЕ.
Димитриевски во однос на барањето на партиите на Албанците во иднина шефот на државата да се бира во парламентот, рече дека земјата не смее да биде заложник на уцени и недемократски барања.
„Вакви барања секогаш доаѓаат во предизборен период, и наводно се политичка пропаганда во функција на изборите. Но, секогаш постои една голема доза на вистинитост и искрен пристап во заложбите од страна на тој етнички блок. Македонија не може да биде заложник на никој…Она што ме загрижува првенствено како граѓанин, но и како човек што носи одговорна функција и претендира за одговорна функција во општеството, заветот на г. Ахмети. Јас од овде, давам завет дека ЗНАМ никогаш нема да дозволи во парламентот да помине такво решение, затоа што тоа ја усложнува државата, дополнително ја намалува моќта на институцијата претседател, која всушност треба да биде заштитник на обичниот граѓанин. Претседателот ја црпи својата сила од самите граѓани и всушност тој ги претставува покрај државата и сите ингеренции кои му се согласно Уставот и законот доверени, и граѓаните и се грижи за граѓаните“, истакна Димитриевски.
За другиот услов на ДУИ дека нема да коалицираат со никого ако нема уставни измени неопходни за отварање на поглавјата во преговорите за членство во ЕУ, тој кажа дека ќе коалицираат, но без условувања.
„Ќе има коалиција од македонските политички партии и ќе бидат повикани оние политички партии од етничкиот блок на Албанците, да учествуваат, секако на рамноправна основа, но без условувања. Затоа што оваа држава има Устав, има закони и ние ќе се водиме по нив. Велат, нема да биде одобрена таквата коалиција. Кој одобрува? Одобрува бројноста во Собранието. Нашата држава ја водиме ние, не ја водат тие кои доаѓаат од надвор и ни кажуваат како треба да ја водиме. Ние мора да преземеме одговорнсот да си ја водиме сами државата, да ја направиме одржлива, да се потпреме на сопствените сили, за да не бидеме уценувани ниту од внатре ниту од надвор“, вели Димитриевски.
На прашањето со кого би коалицирале по парламентарните избори и дали СДСМ чиј поранешен член е, се нивниот приороден коалиционен партнер, лидерот на ЗНАМ вели дека по убедување е левичар, а ќе коалицираат со оние политички субјекти со кои прво на маса ќе ги дефинираат државните национални интереси.
„Ние нема да коалицираме со тие кои досега ѝ правеа штета на Македонија, особено поединци кои заради лукративни интерси продадоа се. Такви има и во редовите на СДСМ и во редовите на ВМРО-ДПМНЕ. Многу побитно е да се најде принципиелен партнер со кој ќе се гради иднината на оваа држава“, рече Димитриевски.
Запрашан дали изборот на Горан Минчев за генерален секретар на партијата и шеф на Изборниот штаб е сигнал дека е близок со поранешниот претседател на СДСМ Бранко Црвенковски, Димитриевски вели го почитува.
„Не, јас мислам дека Црвековски уште ми ја нема потпишано поддршката за кандидатурата. Имам многу пати кажано – го почитувам него и претходните претседатели. Горан Минчев е мој стар соработник со кого многу пати сум имал и различни ставови, но тука имаме и многу нови имиња како што е потпретседателот на партијата Павле Арсовски пензиониран генерал мајор, Весна Бендевска поранешен пратеник, др. Јасмин Циривири“, одговори Димитриевски.
Тој упати апел до граѓаните да ја дадат поддршката за неговата кандидатура за претседател на државата, како и за другите претенденти за претседателската трка со цел, како што нагласи, да има повеќе кандидати за таа функција за да имаат граѓаните поширок избор.
Извор:Мкд мк
