Нека биде секој ден 21 март, не само за лицата со Даунов синдром, за лицата со посебни потреби.
Ова е пораката која Сузана Стојановска, мајка на 20 годишниот Никола ја испраќа на Меѓународниот ден за подигање на свеста за Даунов синдром. Таа за Канал 5 раскажува дека иако животот како родител на дете со Даунов синдром носи свои предизвици, ако се пружи рака, поддршка и љубов секое дете може да напредува. Никола оваа година ќе биде матурант во Средното фискултурно училиште и тој обожува да спортува и да се дружи со своите пријатели. Па така Стојановска како предизвик за социјализација на децата со Даунов синдром, го издвојува немањето на социјален клуб за дружба и апелира до Општините да овозможат ваков соодветен простор.
-Да им подадеме рака зошто навистина многу можат. Можат да напредат ако им се пружи можност и ако им се даде шанса. Немаме социјални клубови, клубови за деца со посебни потреби каде би можеле да се дружат. Имаме многу млади луѓе со типичен развој кои би сакале да ги дружат или да излезат некаде или нешто да направат каде да се соберат. Треба секоја општина да си одреди простор каде наменски лицата со посебни потреби би можеле да се дружат.
Стојановска и со порака за сите родители кои имаат деца со Даунов синдром да си пружаат меѓусебна поддршка , бидејки вели дека во државата се лимитирани можностите за институционална родителска поддршка.
– Тоа е еден од поголемите проблеми кај нас што нема родителска поддршка на младите родители, затоа би им порачала држете се до нас ветераните ќе ви го покажеме правиот и полесниот пат како детето да го изведете на прав пат и да го социјализирате.
Меѓународниот ден на лицата со Даунов синдром, симболично е означен на 21-виот ден од третиот месец во годината, за да одбележи уникатноста на трипликацијата на 21-виот хромозом кој предизвикува Дауновиот синдром.
