Во текот на вчерашниот ден СВР Кичево соопшти дека покрената е кривична пријава против лицето со иницијали С.Т. (49) од Кичево за „проневера во служба“.
Тој е осомничен за „исчезнувањето“ на ехо апаратот од кичевската болница.
Новата директорка на Болнцата Маја Цветановска – Трајковска, вели дека во септември сакала да ја стави во функција ова апаратурата која е добиена како донација пред три години, но не можела да ја најде.
-Јас во септември забележав дека го нема апаратот. Откако ја преземав службената должност сакав да го ставам апаратот во функција, насекаде го баравме но не го најдовме. На 21 октомври откако немаше веќе надеж за пронаоѓање, случајот го пријавив во полициска станица, изјави Маја Цветановска Трајковска, директорка на кичевската болница.
По ова имаше разни теории за локацијата на апаратот.
Откако случајот беше пријавен во полиција, апаратот беше пронајден ноќта меѓу 23 и 24 октомври во отворената гаража на болницата. Бил покриен со кеси и имал натпис „Ќе те уништиме“.
Од тој ден до вчера до околу 14 часот ехо апаратот беше во полиција во одделот за технички криминал. Вчера попладне е ставен во магацин и наскоро ќе се инсталира за да се пушти во употреба.
Меѓу лицата кон кои е вперен прстот за исчезнувањето на ехо апаратот беше и екс директорот на кичевската болница, Станко Трпески. Тој за ТВ21 рече дека е потресен од овие вести и отфрли се што се вели против него.
-Негирам се за што сум обвинет. Полицијата дури и не дојде кај мене дома. Ангажирав адвокат за сите обвинувања што ми беа упатени и се ќе оди на суд за да докажам дека тоа не било кај мене и не сум го земал. Апаратот цело време бил во болница, вели Станко Трпески, екс директор на кичевската болница.
Апаратот е донација од Министерството за социјала и е вреден околу 2 милиони денари. Не беше пуштен во употреба бидејќи требаше да се инсталира и да се обучи персоналот да го користи.
