Кенан Абди, скопјанец кој досега дарувал крв повеќе од 20 пати, сподели непријатно искуство кое го доведе во дилема дали ќе продолжи со оваа хумана активност. Проблемот настанал по последното дарување во февруари, кога поради административен пропуст добил казна од Јавното претпријатие „Паркинзи на Општина Центар“.
„До сега имам дарувано над 20 пати крв. Речиси секогаш дарувам во „Даре Џамбаз“ и се паркирам на паркингот пред самиот влез. Тие пуштаат СМС и така паркингот е бесплатен за крводарителите. Но, претпоследниот пат, во февруари, дарував на истото место, но заради големата гужва, заборавиле да пратат СМС“, раскажува Кенан.
По обидот да ја реши ситуацијата, му било речено дека ако приложи потврда за дарување крв, жалбата ќе биде прифатена. Но, наместо тоа, добил налог од извршител за износ од 8235 денари, што го вклучува долгот за казната и трошоците за извршување.
Не само што ме одбиле, туку на адресата ми доставија налог од извршителот. Како можеле вчера навечер да го донесат директно на врата?“, прашува Кенан, кој ја критикува институцијата и вели дека извршителите се „рак-рана на општеството“.
Оваа ситуација ја отвори дискусијата за тоа како институциите ги третираат крводарителите и дали нивната хуманост заслужува поголема заштита и почит- јавува 4 news.
