Штипјанецот Александар Трајковски, 17-та година по ред донира пакети со храна за подготовка на бадниковата трпеза и божиќниот ручек. По смртта на неговата сопруга тој одлучува секоја година додека е жив и е во можност да донира, со цел ранливите категории семејства да можат достоинствено да ги пречекаат празниците.
– Се одлучив за Бадник и Божик да давам, кога семејствата се собираат, деца, мајка, татко, да си направата јадења за Бадник и за Божик, изјави Александар Трајковски
Како и годините претходно, шест штипски семејства добија донации, а акцијата се спроведе во соработка со Црвениот крст.
– Ова нека биде позитивен пример и за нашите останати хумани сограѓани, кои имаат можност, но пред се желба, да го споделат она што го имаат со оние кои помалку имаат, зашто ним солидарноста им е најмногу потребна, особено за време на овие празнични денови, изјави Деспина Димитрова, секретар на „Црвен крст“ Штип
Донациите се состојат од намирници кои се доволни за да се подготви една скромна бадникова вечера и божиќен ручек.
