Синдикатот на затворската полиција и администрација при Независниот синдикат на државната администрација денеска упати отворено писмо до директорот на Управата за извршување санкции, Александар Пандов како реакција на, како што наведуваат „јавните линчувања кон припадници на затворската полиција со укажување на проблемите со кои се соочувата и на потребата од подобрување на правата на вработените и состојбите во затворскиот систем“.
Затворската полиција му пиша на Пандов: Дали знаете дека има постојани закани кон затворска полиција?
Синдикатот на затворската полиција и администрација при Независниот синдикат на државната администрација денеска упати отворено писмо до директорот на Управата за извршување санкции, Александар Пандов како реакција на, како што наведуваат „јавните линчувања кон припадници на затворската полиција со укажување на проблемите со кои се соочувата и на потребата од подобрување на правата на вработените и состојбите во затворскиот систем“.
„Изминативе неколку дена имаше јавни линчувања кон припадниците на затворска полиција од јавни личности, носители на функција пренесено од медиуми. Со дадените изјави за сегашната состојба во одредени затвори, се поставува прашањето дали воопшто предходникот (директор на УИС) Ви ги пренесе, укажа и објасни состојбите во затворскиот систем?. Со ова отворено писмо до вас и јавноста, а во врска со случувањата во КПУ Затвор Скопје, од страна на Синдикат на затворска полиција и администрација на Македонија ќе Ви одговоривме со: „Дали знаете?”.
Дали знаете кој е оптимално потребен број на припадници на атворска полиција во Затвор Скопјe за вршење на тековни активности“, се наведува во писмото.
При тоа од овој синдикат ги наведуваат и другите бројни проблеми со кои се соочуваат во извршувањето на нивната работа во однос на условите на работа и заканите по нивната безбедност на кои што се изложени од, како што велат, одредени криминални групи надвор од работното место.
„Дали знаете колку има опожарени возила на припадници на затворска полиција? Дали знаете дека се фрлаа бомби во куќа на директор на затвор? Дали знаете дека има постојани закани кон затворска полиција? Дали знаете дека после работа ,одредени криминални групи ги пресретнуваат затворските полицајци и физички се малтретирани?“, прашуваат од Синдикатот на затворската полиција
Тие прашуваат и дали директорот на УИС, е запознаен кога имаат последен пат земено комплет службена униформа, дека некои припадници немаат задолжено средства за присилба (средства за врзување – лисици, гумена палка, пепер спреј-солзавец…), дека речиси да нема држава каде што не се употребува електричен пиштол, и дека нема набавено ниедна „боди-камера”, која е законска обврска и дел од опремата?
Се наведува и проблемот со обуката на вработените за употреба на боречки вештини, дека има припадници кои над 20 години не се обучени и упатени на гаѓање, дека немаат соодветни возила за транспорт на притворени и осудени лица , немаат посебна просторија при арестанско сместување во болница.
„Дали знаете колку припадници имаат напуштено и ќе напуштат работа бидејќи е неиздржливо да се работи во Затвор Скопје и Идризово. Дали знаете дека веќе не е проблем платата за напуштање на работата, туку отсуството на лична безбедност, еден извршител на повеќе работни позиции во исто време? Дали знаете дека по каква било промена на Законот за извршување на санкции, или некој правилник, треба затворските работници да го применуваат, а не лица кои се во работната група (професори, судии, лица кои воопшто не работеле во затвор)“, се посочува во отвореното писмо.
Потсетуваат дека на првиот состанок со директорот на Управта за извршување санкции во јули 2024 година, му укажале дека недостасуваат полицајци, но и изразуваат подготвеност заеднички да се справат со девијантните однесувања кај нивни припадници.
„ Како Синдикат на затворска полиција и администрација на Македонија имаме уште многу забелешки кои и понатаму ќе Ви ги укажуваме, со цел подобрување на правата на вработените и состојбите во затворскиот систем. Но прифаќаме, заедно да се бориме против секое девијантно однесување на кој било“, се наведува во отвореното писмо од Синдикатот на затворската полиција.
Директорот на Управата за извршување санкции Александар Пандов вчера изјави дека 70 телефони биле откриени кај притвореници во Истражниот затвор „Скопје“ (Шутка) во претреси во текот на денот во 40 ќелии, извршени од интервентна единица од затворот „Идризово“.
Во интервју во Дневникот на ТВ Сител тој рече дека затворскиот полицаец за кој се сомнева дека му помогнал на притворениот Васил Јованов кој ја предизвика сообраќајкајната несреќа во која загина 22-годишната Фросина Кулакова, да дојде до мобилен телефон е суспендиран од работа.
Пандов тврди дека во најголем дел мобилните во затворите ги внесуваат затворските полицајци и дека во корумпирано општество како нашето, затворскиот систем е најкорумпиран. Освен новите раководители на затворите, во овие казнени установи, рече, работи истиот персонал што го наследиле. Соопшти дека во моментов во Обвинителство се води постапка против триесет и двајца, а против сто затворски полицајци и други вработени во затворите се поднесени дисциплински постапки. За да се справат со корупцијата во затворите, формирани се интервентни единици – една во „Идризово“ и една во затворот во Штип.
