Клиниките Жан Митрев и Систина ги отворија вратите за повредените од пожарот во кочанската дискотека кој изби ноќеска.
Во вакви моменти, кога зборовите се немоќни да ја опишат болката што ја чувствуваме, најважно е да бидеме заедно. Трагедиите нè потсетуваат дека човечноста, солидарноста и поддршката се најсилните нешта што ги имаме.
Вратите на Клиниката Жан Митрев се отворени за секого кому му е потребна медицинска помош, а нашиот тим е подготвен да одговори на секој повик со највисоко ниво на грижа и посветеност. Веќе неколку лица од несреќата се згрижени во нашата клиника. На располагање ги ставаме и амбулантни возила на Клиниката за да стигнеме до сите на кои им е потребна помош. Ова се моменти кога мора да останеме сплотени, да си помогнеме и да покажеме дека никој не е сам. Со мислите и срцата сме со повредените, нивните семејства, велат од Жан Митрев Клиниката.
Од Систина информираат дека со сите свои ресури се ставаат на располагање за транспорт и прифаќање на повредените лица во трагичната несреќа во Кочани.
Ве известуваме дека веќе е направен прием на тешко повредени пациенти во болницата. Болницата е во постојана комуникација со Министерството за здравство и се вклучува во помош онаму каде е најпотребно. На располагање се 20 интензивни места за третман на најкритичните пациенти, како и целокупниот капацитет и медицнски тим на болницата неопходен за итен третман, велат оттаму.
