Силно невреме проследено со град и обилен дожд го погоди Охрид денес попладне, предизвикувајќи проблеми во сообраќајот и поплави на повеќе улици во градот.
Во период од само неколку минути, улиците беа преплавени од вода, а некои подруми и деловни простории беа поплавени. Граѓаните на социјалните мрежи споделуваат снимки од градот каде се гледа како водата тече како река по улиците, а градот со големина на лешник удира по возилата и покривите.
Според првичните информации, засега нема повредени лица, но материјалната штета сè уште се проценува. Екипите на комуналните служби се на терен и работат на санирање на последиците од невремето.
Надлежните апелираат до граѓаните да бидат внимателни, особено при возење низ поплавени делови од градот и да избегнуваат подрумски простории во текот на следните часови поради можни нови врнежи.
