Загуба за македонската култура и музика
Македонската музичка сцена остана без еден од своите најталентирани и најпосветени уметници – Кристијан Волчев. На само 36 години, почина гитаристот кој со својата виртуозност и искрена љубов кон музиката инспирираше генерации ученици и љубители на квалитетен звук. Неговата смрт претставува ненадоместлива загуба за културата и музичката педагогија.
Роден во Скопје во 1988 година, Волчев своето образование го започна во ДСУ „Никола Карев“, каде што ги постави темелите на своето класично музичко усовршување. Со текот на годините, тој ја надмина традиционалната рамка на класичната гитара, внесувајќи современ дух и автентична емоција во своите изведби и композиции.
Професор, аранжер, рок музичар
Како професор по класична гитара, Кристијан Волчев ги подучуваше своите ученици со страст и посветеност, оставајќи силен печат врз нивниот уметнички развој. Надвор од класичната сцена, беше активен и како гитарист во алтернативниот рок бенд Grey (Греј). Неговиот придонес во обработката на традиционални македонски песни, како „Јовано Јованке“ и „Со маки сум се родила“, беше доживеан како длабоко почитување кон македонските музички корени, преточено во нова звучна облека.
