Македонија
Славески: Македонија златото го чува во Банка во Англија, ќе проверам дали е таму
Автор:
Деск 4NEWS.MK
22/07/2025 14:59
Гувернерот на Народната банка, Трајко Славески, денеска на отворена работна средба со претседателот на Стопанската комора, Бранко Азески, изјави дека и покрај стабилноста на девизните резерви, нивото на монетарното злато не е задоволително. Тој изрази недоумение зошто е прекината праксата на зголемување на златните резерви, особено во услови кога цената на златото на светските берзи континуирано расте.
Според Славески, вкупните девизни резерви моментално изнесуваат меѓу 4,6 и 4,7 милијарди евра, што е, како што рече, „комотна позиција“ за земјата, бидејќи покриваат приближно 4,5 месечни вредности на увозот, над светскиот препорачан стандард од 3 до 3,5 месеци.
Девизните резерви се во сигурни раце. Со нив раководат обучени професионалци, со дневно следење на пазарните движења и редовно поднесување извештаи до Собранието. Дел од средствата се вложуваат во сигурни хартии од вредност и во стабилни банки, од кои добиваме позитивен принос – изјави гувернерот.
Тој потврди дека дел од девизните резерви се чуваат во злато, кое Македонија го депонира во Банката на Англија. За есен е планирана посета на оваа институција од страна на тим на Народната банка предводен од гувернерот, со цел директна проверка на златните резерви.
– Не знам зошто е запрена практиката да се зголемува износот на монетарното злато. Во минатото го откупувавме домашното злато од рудниците и го стававме во резервите. Цената на златото само во последната година се зголеми двојно. Во услови на глобална несигурност, инвеститорите секогаш бараат сигурни средства, а златото е едно од нив – истакна Славески.
