Охридскиот музичар Горан Андреески, кој со години важи за еден од најдобрите тапанари во Македонија, денес е сè поактуелен како ново музичко лице.
Наместо класичниот сет на тапани, Андреески настапува во ноќните клубови тропајќи на конги, создавајќи препознатлив ритам и атмосфера која ја освојува публиката.
Покрај настапите, тој неодамна почна да објавува и кратки рилчиња на социјалните мрежи, преку кои ја прикажува својата виртуозност и енергија на сцената. За видео проектите е задолжен охридскиот шоумен Вик Какаротски, кој се грижи сè да изгледа професионално и визуелно впечатливо.
„Со конгите пронајдов нов начин да ја споделам музиката со луѓето. Секој настап е различен, бидејќи ритамот секогаш носи нова енергија.
Ми е драго што публиката тоа го препознава и што преку рилчињата можам да ја приближам атмосферата и до оние што не се таму во живо,“ вели Андреески.
Оваа година, на Велики Петок, тој ја промовираше и својата прва инструментална композиција „Воскресение Христово Пасха“, посветена на Христовото Воскресение, како дел од проектот „Желба“. Со тоа потврди дека неговата музика умее да ги обедини и духовното и современото, оставајќи силен впечаток и на сцената и кај публиката.
