Премиерот Христијан Мицкоски денеска кај клучката кај аеродромот „Св. апостол Павле“ присуствуваше на пуштањето во употреба на дел од автопатот Кичево – Охрид, на делницата Климештани – Охрид.
На настанот присуствуваа и потпретседателот на Владата и министер за транспорт, Александар Николоски, директорот на ЈП за државни патишта, Коце Трајановски и градоначалникот на општина Охрид, Кирил Пецаков.
Во своето обраќање, премиерот Мицкоски потсети дека заедно со Николоски и Трајановски минатиот месец извршиле увид на градежните активности долж трасата на автопатот, при што беше пуштен во употреба надвозникот на клучката кај селото Подмолје.
Тој истакна дека интензивно се работи на делови од трасата каде што има свлечишта, а истовремено се изработуваат и проекти за стабилизирање на земјиштето, што е од особено значење за завршување на целата траса.
– Станува збор за неколку километри кај селото Ботун, но и за деловите каде што се поврзува тунелот кај Пресека. Кај Кичево има десетина свлечишта, а овде шест, така што очекувам од есенва да се изведуваат теренски активности, со што целата секција од Кичево до Охрид ќе биде стабилизирана и безбедна – изјави Мицкоски, нагласувајќи задоволство од динамиката на работите.
Покрај на овој автопат, со несмалено темпо се работи и на уште три автопатски делници во земјава: Тетово – Гостивар, Гостивар – Букојчани и Прилеп – Битола. Истовремено, во тек се јавни повици и тендерски процедури за изградба на делниците Блаце – Скопје и Букојчани – Кичево.
