Градоначалникот на скопската општина Шуто Оризари, Курто Дудуш, денеска ја призна вината дека минатата година го нападнал Демир Исмаил по што Кривичниот суд му ја изрече казната „судска опомена“. Освен ова, Дудуш на рочиштето изјави и дека „жали за стореното“.
По изрекнувањето на пресудата Демир Исмаил изјави дека со приватна тужба подоцна ќе бара оштета од градоначалникот на Шуто Оризари. Евентуално добиените пари ќе бидат донирани во хуманитарни цели.
Нападот на Дудуш врз Исмаил кој е претседател на Европската ромска дијаспора „Асва“ се случил за време на одржувањето на ромскиот бал. Исмаил рече дека проблемот настанал заради тоа што на градоначалникот не му се допаѓало што неговата организација донира храна и облека за жителите на општината.
