Оваа паника е создадена од СЗО, исфорсираа тестови кои не се меродавни за следење на инфекциите, не предложија користење на серолошките тестови на антитела и донесеа строг став да се затворат сите држави и да не се излегува надвор. Па, ние во средниот век сме имале повеќе можност да патуваме отколку сега, вели професорот д-р. Вело Марковски во емисијата „Само вистина“ на Канал 5.
– Низ светот луѓето се повеќе исплашени од што треба. Во истиот период од 3 месеци само од сообраќајни несреќи имаме 300.000 починати во светот, па не значи дека да направиме мерки никој да не вози. Ние станавме заложници на овој модел што го избравме и сега треба да продолжиме. Тој е во ред, само ако Комисијата за заразни болести има стратегија дека некаде кон крајот на мај вирусот сам ќе се повлече – вели Марковски.
Тој смета дека сега не можеме да одиме на колективен имунитет, а доколку одевме на полабави мерки ќе имавме околу 10 отсто од населението во контакт со вирусот.
– Вакцината како опција не е реална затоа што не знаеме кога ќе се создаде и затоа сега одиме на тоа дека вирусот природно ќе се повлече. Сепак, прашањето е што доколку се продолжи со овој модел уште три месеци, од економски аспект? – додаде професорот.
Тој нагласи дека од сезонските грип има повеќе починати во светот, отколку од коронавирусот и дека лошо е што оваа болест се споредува со моделот и бројките на грипот.
