Зоран Заев како носител на четвртата изборна единица, Христијан Мицкоски шпицен кандидат за мандатар– лидерите на двете најголеми партии ја започнаа трката за премиерската позиција.
Од утринава претседателите и носителите на изборните единици,одржуваат средби со нивните симпатизери.
Лидерот на СДСМ Зоран Заев на првиот ден од кампањата одржа трибина во родната Струмица. Оттаму потсети на досега сработеното во евроатлантските интеграции, економските проекти во корона кризата и идните планови. Но, не изостанаа и критиките за неговиот опоненет.
ВМРО ДПМНЕ традиционално го почнува предизборието вечерва во Охрид каде што ќе обрати лидерот на партијата Христијан Мицкоски. Партискиот потпретседател, кој воедно е и носител на двојка, Владо Мисајловски, ветува дека ќе води позитивна кампања со акцент на борба со корупцијата и со понуди за економско подобрување. И тој ја искористи приликата за споредба со владејачката партија.
„ Мора да се стави крај на корупцијата и криминалот на Заев, Спасовски, а овде во Ѓорче Петров на Наумовски. Ќе продолжам со позитивна кампања. Јас не можам да размислувам за црни работи. Јас ќе зборувам за колку ќе бидат повисоки платите, пензиите, ќе зборувам за инфраструктура. Да се натпреваруваме со проекти, а не со подметнување на црни сценарија“, вели Владо Мисајловски – потпретседател на ВМРО ДПМНЕ.
На овие избори ќе учествуваат 15 коалиции и политички партии. Иако поради специфичните околности нема да има големи митинзи, средби со граѓани ќе има, а од партиите ветуваат дека ќе ги почитуваат мерките за заштита од корона вирусот.
