Талат Џафери, претседавачот на Собранието, рече дека немал телефонски контакт од двајцата пратеници на новата парламентарна партија „Левица“, по што тие доцна ги добиле известувањата дека денеска ќе се одржува седница за избор на спикер на Законодавниот дом, односно потребните материјали за работа.
Претходно, Димитар Апасиев, претседателот на „Левица“, се пожали дека дури во 9.00 часот денеска претпладне бил известен дека треба да се јави во 11.00 часот на координативна средба во Собранието.
„Во моментот кога ги добив материјалите, не можев вчера да ги пуштам до пратениците, но изутрина ги известив претставниците на партиите, со исклучок на „Левица“, со чиј претставник немав директен телефонски контакт но тоа го регулиравме од денеска натаму. Инаку вчера на полноќ не би можел да го барам толку доцна“, рече Џафери денеска од својата говорница.
Апасиев претходно реагираше дека Собранието како врвховен државен орган треба да покаже поголема сериозност во работењето.
„Сабајлево, во 9:00 часот, добивам СМС дека денес во 11:00 часот сум поканет, како претставник на Левица, на координација во Уставна сала во Собранието на РМ, од страна на претседавачот Таљат!?
Сета среќа шо у Скопје живеам… Еве, у Охрид да живеев, ќе требаше ваљда со хеликоптер да летнам?
p.s. Шала на страна, патец у средина. СЕРИОЗНА е работава со вашава несериозност! Собрание ли водите или селска кооперација!? Па ја во односот со студентите имам покоректно однесување, отколку вие „државници“ со пратениците“, напиша Апасиев оретпладнето на Фејсбук.
