Како што известува ТВ Телма полицијата и натаму трага по советникот во општина Охрид, Нефи Усеини за кого е определена мерка притвор и е во бегство. Потрагата по Усеини продолжува и покрај пишаната амнестирачка изјава од неговата жртва Спирко Топалоски кој сега тврди дека само се скарале со советникот и не видел пиштол .
Преку својот адвокат, Топалоски испрати писмена изјава во која тврди дека разговарале со советникот Усеини и дека тогаш добил удар одзади. Жртвата Топалоски сега го брани напаѓачот тврдејќи дека приказните прераснале во филм за да му се наштети политички на Нефи Усеини и да се дискредитира неговото име.
Сопствениот стрес по ударот придонеле да стекне впечаток дека е нападнат со пиштол иако тој оружје не видел, стои во писмената изјава на Топалоски. Нападнатиот тврди дека неговиот напаѓач му е и ќе му остане пријател и по ова недоразбирање кое е надминато. Неговиот адвокат Христијан Спировски потврди дека изјавата е од Топалоски и не сакаше да коментира повеќе бидејќи во тек е истрага.
Полицијата и охридското обвинителство го гонат Нефи Усеини и неговиот брат за две кривични дела, насилство и недозволено држење на оружје откако на снимки од безбедносните камери на местото на инцидентот е видено како се одиграл нападот и дека таму навистина бил изваден и пиштол.
Усеини е во бегство, а судот по барање на обвинителство му определи 8-дневен притвор. Нема информации дали Усеини избегал од Охрид и државата, иако првичните претпоставки е дека тој е во градот.
Усеини е советник на ДУИ во општината, а стана позната по повеќе дивоградби во градот и околината кои досега не се отстранети освен бетонската база на влезот во Охрид.
