Кафе барот „Интермецо“ вчера продолжил да работи, иако имаше 30-дневна забрана за работа. Ова го откри градоначалникот на Општина Центар, Саша Богдановиќ на својот Facebook профил и најави кривична пријава по добивањето на записниците.
– По извршените контроли на кафе барот „Интермецо”, вчера вечер истиот продолжил со работа и покрај изреченото решение и забраната за работа од 30 дена. Пломбата поставена на влезот на локалот е отстранета што согласно членот 389 од Кривичниот законик, претставува кривично дело казниво со парична казна или со затвор до 3 години, напиша Богдановиќ.
Тој посочува дека по добивање на записниците, Општина Центар до надлежните органи ќе поднесе кривична пријава за симнување на службен печат.
Скопското кафуле „Интермецо“ беше затворено по пријавите од граѓани дека се пушта многу гласна музика. На кафе барот му беше изречена забрана за работа во следните 30 дена и глоба од 6.000 евра.
