Во понеделник истекува рокот на ваучерите за туризам, помошта наменета за ранливите категории граѓани кои можеа да ги искористат за одмор во некои од македонските туристички центри. Од Министерството за економија за Фактор велат дека во нивната програма за 2021 година исто така има предвидено активност за издавање на ваучери за туризам, но тоа најверојатно ќе биде некаде во април.
-Дополнително за износот на ваучерите, како и начинот за издавање ќе се дефинира во самата Програма за 2021 година. Инаку, заклучно со вчерашниот ден искористени се 57.048 ваучери за туризам. Неискористените ваучери пропаѓаат и средствата предвидени за овие ваучери се враќат во Буџетот на РСМ, посочуваат од Министерството за економија за Фактор.
Истовремено, од Министерството за економија појаснуваат и дека согласно Програмата за 2021 година се предвидува и издавање на ваучери и други проекти за опоравување од кризата со корона вирусот.
Инаку, добитниците на ваучери за летување од 6.000 денари летувале убедливо најмногу во хотелот Инекс Дрим во Струга според исплатите на Министерството за финансии до 1 октомври.
