За прославата на роденденот на лидерот на ДУИ Али Ахмети вчера, во новите простории на Министерството за политички систем, на која членови од врвот на партијата не носеа заштитни маски, претседателката на Инспекцискиот совет Магдалена Грашковска одговори дека сите инспекторати постапуваат неселективно и вети дека така ќе биде и за овој случај.
„Надлежната инспекција ќе ги провери наводите дали има одредени прекршувања на протоколите и благовремено дополнително ќе бидете известени за сето она што е констатирано од нивна страна”, рече Грашковска.
Според неа, граѓаните биле совесни за новогодишната ноќ која поминала без многу прекршувања на протоколите за заштита од ковид-19. Таа очекува дека така да биде и за претстојните празници и апелира граѓаните и стопанствениците да ги почитуваат мерките.
„Да празнуваме одговорно, во кругот на семејството, да се воздржиме од прослави и да нема групирања. Надлежните инспекциски служби и во текот на наредните денови ќе спроведуваат интензивни контроли на терен, со цел да се спречи ширењето на коронавирусот, рече Грашковска, која денеска ги презентираше податоците за спроведените контроли од 28 декември до 3 јануари.
Во овој период, седумте инспекциски служби извршиле вкупно 5718 надзори и контроли.
Во однос на палењето бадникарски огнови што традиционално се организираат на 5 јануари навечер, потсети дека е сè уште во сила мерката за забрана за групирање на повеќе од четири лица на јавни простори.
