Да нема разлики и несогласувања дали сме за напред или за назад. Сите да бидеме за напред, едни локомотивата, а другите вагоните. Ама сите напред. Сметам дека на СДСМ му личи да биде локомотива, рече Заев.
Во недела на 21 март ќе се одржат директни внатрепартиски избори. Членовите на СДСМ директно ќе го изберат својот претседател. Како кандидат за претседател излегувам со програма и ја барам поддршката за нов мандат. Доколку ја добијам довербата, најавувам досега најголема политичка акција за нова позитивна промена на начинот на функционирање и менталитетот на политичките партии во земјава, почнувајќи од СДСМ, рече премиерот Зоран Заев на денешната прес-конференција.
– Дали е можно ново после новото? Да, подготвени сме и ние тоа ќе го покажеме. Некои многу сработуваат и одат напред, а некои многу потфрлија. Единствениот долг кој го прифаќам е долгот кон граѓаните. И тука се темели новиот начин на работа. Никој повеќе во СДСМ нема да се кандидира за функција само за да биде функционер, туку за да им служи на граѓаните. Второ, новата политика значи ангажирање на сите капацитети во борба против корупцијата и криминалот. На ред е правдата. Истото важи и за сите нас од СДСМ. Членската книшка не значи привилегија, туку одговорност. Борбата против криминалот и корупцијата носи подобар стандард, здравство, образование, но и побрз пат кон ЕУ. Трето, јас отсекогаш сум верувал во моќта на демократијата. Разноликоста на мислењата во СДСМ е богатството на партијата. Слушам некој зборува за претерана демократија, но цврстата рака е симбол на режим. Што сакаме, режим или слобода? Одиме напред во секој можен поглед и враќање назад нема – рече Заев.
