Заменик министерот за здравство д-р Илир Хасани побара од премиерот на Албанија Еди Рама, aлбанското здравство да ѝ отстапи на Македонија вакцини против ковид-19. Хасани вели дека во Албанија е подобрена состојбата во поглед на располагање со вакцини и дека би било добро да помогне во имунизацијата на населението во нашата земја, каков што гест, нагласува тој, неодамна направи Србија. Заменик министерот за здравство Илир Хасани упати порака до премиерот на Албанија Еди Рама да ѝ помогне на Македонија со донација на извесен број на вакцини против ковид-19. Во интервју за весникот Лајм, Хасани рече дека бројот на вакцини во Албанија во последните денови е значително зголемен, затоа тој решил од властите во Тирана да побара да испратат вакцини за Македонија, имајќи предвид, како што нагласил, дека земјата има недостиг и проблеми со набавката.
„Вистина е дека доцниме со вакцинирањето на населението. Имам предвид дека во моментов бројот на пристигнати вакцини во Албанија е значително зголемен. Всушност, имајќи ја предвид соработка со Србија, ја разгледав и опцијата да го замолам премиерот Еди Рама да нѝ даде определена количина на вакцини со би ѝ се помогнало на земјава. Јас ова не го велам случајно, туку затоа што секој ден на доцнење со вакцинацијата може да значи повеќе болни и поголема загуба на животи. Проблемот е поголем отколку што мислевме. Прашањето на вакцините е глобален проблем и е потребен сериозен пристап кој нема тесно да биде дефиниран на поединци, туку ни треба поширок меѓусекторски и меѓудржавен пристап“, вели Хасани.
Тој нагласува дека и некои од земјите на ЕУ исто така испратија писма до Европската комисија укажувајќи дека механизмот на ковакс создава нееднаквост помеѓу државите, поради што, како што потенцира, потребна е солидарност помеѓу земјите од Балканот. Инаку, викендов преку ковакс-механизмот во Албанија пристигнаа 38 илјади дозви вакцини, а е најавена уште двојно поголема количина. Албанија ќе добие и финансиска помош од Европската Унија за вложувањата во здравствениот систем за време на пандемијата.
