Министерот за внатрешни работи Оливер Спасовски мудро ги одбегна новинарските екипи, кои сакаа да добијат одговори на разни теми меѓу кои и најактуелната – за бегалците од Авганистан. На церемонијата по повод денот 20 години од Единицата за брзо распоредување, Спасовски се обрати кон јавноста, но иако по завршувањето на настанот медиумите го чекаа на излезот од Полицискиот Центар во Ѓорче Петров, од одделението за односи со јавност информираа дека прашања не биле предвидени. Се поставува прашањето, зошто министерот избегнува да се сретне со медиумите? Додека цела јавност е збеснета по најавите за прифаќање авганистанци.
„Единицата за брзо распоредување (ЕБР) при Министерството за внатрешни работи е единица која по својот состав, улога, професионални специфики, како што впрочем и напишав во воведниот текст од монографијата по повод овој дводецениски јубилеј на нашите колеги од ЕБР, претставува клучна алка во остварување на полициските цели на безбедноста, а тоа е заштита на сигурноста, слободите, правата, материјалните добра на граѓаните, како и заштита на правниот поредок, на јавниот ред и мир, овозможувајќи внатрешна сигурност и стабилност на државата“ – Ова го нагласи министерот за внатрешни работи Оливер Спасовски во денешното обраќање на пригодната свеченост, по повод одбележувањето 20 години од нејзиното формирање, што се одржа во Полицискиот центар „Ѓорче Петров“ во Скопје, а каде пред присутните гости се обратија и премиерот Зоран Заев и командантот на ЕБР, Вице Столески.
