„Сите анализи и анкети покажуваат дека расположението во државата е дека СДСМ со коалицијата се фаворити и на овие локални избори. Очекувам дека со најдобрата понуда што ја имаме во делот на кандидати за градоначалници, советници и програма, како и коалициониот потенцијал ќе имаме победа на престојните локални избори“ кажа министерот за внатрешни работи и потпретседател на СДСМ, Оливер Спасовски во емисијата „Жешко политичко лето“ на Канал 5.
Тој додаде дека кадровската и програмската понуда за секој општина се подготвува внимателно со цел да се изберат вистинските кандидати и најдобрата програма за граѓаните.
Запрашан за тоа победата во кои општини, СДСМ ќе ја смета за победа на изборите, Спасовски одговори дека тие ја градат Северна Македонија како едно општество за сите во кое сите граѓани се важни.
„Нема неважна општина за СДСМ и коалицијата. Се подготвуваме за максимално добри резултати и убеден сум дека го имаме најдоброто решение за сите општини и Град Скопје“ кажа Спасовски.
Тој доаде дека се уште не се објавени кандидатите за градоначалници на неколку општини бидејќи во тек се внатрешни анализи кои треба да поминат низ органите и телата на паријата.
„Семејството, политичкото семејство, интересот на градот и државата и сето она што значи взаемна политика за сериозен напредок треба да бидат ѕвезда водилка и со таква политика ќе настапиме секаде“ кажа Спасовски.
