Роднините на патниците кои беа во опожарениот автобус, од вчера во неизвесност чекаат пред вратите на болницата во Софија. Асим Селами од Количани, во трагичната несреќа во Бугарија ја загуби ќерката и зетот. Од вчера е во Бугарија за да ги земе телата, но, како што вели, сѐ уште не ги идентификувале. Изразува револт поради недостиг информации од страна на институциите и поради тоа што блиските роднини на преживеаните чекаат без некоја поконкретна информација.
„Дојдовме бидејќи ќерката и зетот починаа во несреќата. Чекаме на ДНК анализи и треба да одиме во судска медицина“, истакна Асим Селами.
Али Селмани пак, од скопско Количани, во стравотната трагедија загуби тројца членови од семејството, а во болница се згрижени уште четворица, меѓу кои и сопругата. За повредените им рекле дека се во добра состојба, но и покрај тоа не им дозволуваат да ги посетат. На трагично настраданите, како што дознал од братот на сопругата, денеска им бил земен ДНК материјал за идентификација.
„Ние немаме никаков контакт ниту со Амбасадата, ниту со некој друг. Апелирам и до нив, и до вас, медиумите – овој процес да заврши што поскоро. Не знам што да кажам, колку повеќе чекаме, толку поболно е за нас. Добивме информации дека преживеаните се во добра состојба“, додава Али Селмани.
Министерот за надворешни работи, Бујар Османи, пристигна во приватната болница во која се третираат седуммината преживеани патници. Вели дека е тука за да ја олесни комуникацијата меѓу роднините и институциите во Бугарија.
„Причината зошто дојдов тука е за да ја олеснам комуникацијата со семејствата, со луѓето. Верувам дека нема да има потреба сите да се идентификуваат преку ДНК, така што, тука сум за да станам мост меѓу роднините и институциите во Бугарија“, посочи Бујар Османи.
Обдукцијата на телата на жртвите во автобуската несреќа се очекува да заврши до крајот на денот, а идентификацијата до крајот на неделата, по што нашата држава ќе организира пренесување на останките во Скопје, рече Османи. ТВ21 контактираше со директорот на Институтот за судска медицина, Александар Станков, кој рече дека се наоѓа во Софија и дека се земени примероци од роднините, додавајќи дека до утре се очекува да излезат и резултатите од обдукцијата.
