Повеќе бугарски медиуми вечерва ја објавија веста дека премиерот на Бугарија Кирил Петков го отстранил од заедничката фотографија со македонскиот премиер Димитар Ковачевски и државниот секретар на САД Ентони Блинкен од нивната средба на Минхенската безбедносна конференција. Повеќето медиуми во насловот на веста напишаа: Зошто Петков го исече Ковачевски?
Во веста што ја објавуваат повеќе портали во Бугарија се потсетува дека фотографијата со Блинкен прв ја објави Ковачевски и дека напишал дека имале срдечна средба со државниот секретар на САД и дека „Блинкен ја изрази својата целосна поддршка за дијалогот и пријателството меѓу Северна Македонија и Бугарија и ја сподели својата искрена желба да нѐ види заедно во ЕУ“.Неколку часа подоцна, пишуваат бугарските медиуми, Петков објави фотографија од која „исчезнал“ Ковачевски. Петков под фотографијата напишал дека елиминирањето на корупцијата е основен приоритет и дека „ќе работиме заедно за да се справиме со проблемот“. Во групната пак објава преку социјалнитге мрежи тој поместил и фотографии од средбите со британскиот премиер Џонсон и францускиот претседател Макрон.
Медиумите забележуваат дека за средбата на Блинкен со Петков и Ковачевски „засега не известил Вашингтон“, поради што е нејасно дали можеби станува збор за случајна средба на која се разменети неколку мислења.
