Водителот и бизнисмен Жарко Димитриоски од „Еден на Еден“ во интервју за „Женски магазин“ за првпат искрено зборува во јавноста дека по подолго време е повторно „сингл“, по раскинувањето на долгогодишната врска. Според него, ниедна врска нема смисла на долг рок, ако немаш вистински, искрен партнер покрај себе.
*Се изненадив кога дознав дека си сингл подолго време. Зошто го криеш тоа?
– Не го кријам воопшто. Едноставно, не сум човек што цело време слика и објавува кај е, со кого е и што прави. И да ти кажам, од тоа не сум видел некој зијан. Инаку, се разбира дека знаат тие што треба и тие луѓе што ми се поблиски. Растрчани се, бараат девојки под дрво и под камен, ако знаеш некое добро девојче кажи. (се смее)
*По колку време ја прекинавте врската, и што мислиш, постои ли пријателство или барем коректен однос по долга љубов, или повеќето (особено јавни личности) тоа го кажуваат за да создадат подобра слика во јавноста?
– Бевме долго време заедно и поминавме убав период. Јавна личност или не, не правам разлика, ако двајцата луѓе се доволно зрели ќе најдат начин да се разделат човечки и со разбирање. Тоа подразбира и да останат пријатели, а секако подразбира да задржат коректен однос.
