Пред два месеци Управата за извршување на санкции за прв пат добила информации дека во затворот Идризово се планира организирано бегство на затвореници, поради што била подигата безбедноста за да се дојде до подетални информации, соопштија попладнево од таму.
Било лоцирано потенцијалното место каде би можело да се наоѓа тунелот, во кругот на Затвореното одделение. Обезбедувањето било зајакнато во оваа точка. Во овој дел имало стари објекти од тврда градба кои биле вон употреба, поради што било потребно рушење. Бидејќи се работи за активност во вредност од над 1.000 евра, Управата морала да спроведе тендер и денеска рушењето започнало, а со тоа и бил откриен тунелот.
Од причина што се работи за стари објекти од тврда градба кои се вон употреба, по спроведена постапка за јавна набавка избрана е фирма со соодветна дејност за рушење на наведените објекти. Откако е постигната согласност со Министерството за внатрешни работи со свои сили да обезбеди асистенција при реализацијата, денес на ден 21.03.2023 година во 07.00 часот е пристапено кон рушење на детектираните објекти“, информираа од Управата.
При рушењето биле направени повеќе ископи во кругот на одделението и така бил откриен тунелот во должина од 50тина метри. Тунелот се протегал од објектите кои се рушат кон оградниот ѕид.
„По завршените планирани активности и реализираното рушење, во попладневните часови се на терен надлежните органи кои треба да ги истражат сите околности со цел да се утврдат сите факти до целосно расчистување на сите работи.. По добивање на подетални податоци кои можат да се споделат со јавноста, ќе бидете дополнително информирани“, велат од Управата.
