Стотици веројатно и илјадници пациенти наместо хемотерапија можеби примале физиолошки раствор на онкологија.
Полицијата и обвинителството два дена ја „тресат “ клиниката, но засега не се соопштуваат детали.
Од ОЈО информираат дека се извршени претреси на клиниката, но и во два приватни станови како дел од предистражна постапка и се прават за да се обезбедат докази за евентуално кривично дело.
Досега се одземени компјутерски податоци, компјутери и пишана документација.
Основното јавно обвинителство Скопје и Министерството за внатрешни работи продолжуваат да преземаат дејствија во предистражна постапка, поведена врз основа на наводите во новинарски текстови… Проверките се прават со цел обезбедување докази за да се испитаат евентуални обележја на кривично дело, информираа од ОЈО.
Институциите да се произнесат брзо по однос на истрагата побара актуелниот министер за здравство Фатмир Меџити. Тој преку соопштение ја поддржа акцијата на полицијата
Како министер силно ги осудувам сите обиди или дејствија, на поединци или групи кои преку дискрециони овластувања и начини на носење на одлуки во сопствена корист, направиле ненадоместива штета врз здравјето и животот на пациентите, граѓаните и државата. Очекувам институциите да се произнесат брзо по однос на истрагата, напиша Меџити.
Акцијата доаѓа откако медиумите со месеци пишуваа дека на универзитетската клиника за онкологија има разработено криминална бизнис мрежа со препродавање лекови. Во истата наводно биле вклучени повеќе лекари и медицински персонал .
Сомнежите се дека во системот биле внесувани и пациенти кои не боледуваат од карцином а лековите предвидени за нив завршувале на црниот пазар.
Сепак, најстрашниот дел е дека и дел од вистински болните од рак наместо скапа биолошка терапија веројатно добивале помали дози, па дури и само обичен физиолошки раствор.
Кристина Алексиеска Alfa
