Во интервју за „Независен.мк“ министерката за одбрана Славјанка Петровска меѓудругото зборуваше и за планот за набавка на оружје и опрема за модернизација на македонската Армија.
„Целосната модернизација на армијата е предвидена во долгорочниот план за развој и „според проценките направени тогаш, требаше да чини околу 900 милиони евра. Но, цените на воената опрема се зголемуваат, па правиме нови проценки за тоа што треба и кои капацитети треба да ги зајакнење и сето тоа да го рефлектираме во буџетот на државата. Овој буџет што го имаме сега од 2,05 проценти од БДП што е е над границата да биде доволен за тие потреби, но поради растот на цените и случувањата во светот ќе треба малку позабрзано да ја спроведуваме модернизацијата така што голема е веројатноста идната година да ни требаат уште повеќе сретства за одбраната“ – рече Петровска.
Таа посочи дека сите процеси, а особено крупните набавки што се предвидени и што значат драстична промена на капацитетите на армијата, се одвиваат според планот.
„Неодамна добивме позитивна вест од САД дека ни беше одобрена набавката на лесни оклопни возила JLTV и на противоклопни системи “Javelin” , а вчера на седница на влада го предложив договорот за набавка на хеликоптери. Изминатиот месец интегрираниот проектен тим што беше задолжен за оваа набавка интензивно работеше на договорот и на финалните преговори со компанијата „Леонардо“, така што тој процес успешно е завршен, постигната е поволна цена и е обезбеден поголем квалитет со обезбедената дополнителна опрема. Цената за сите осум хеликоптери е 230 милиони евра и ќе се плаќаат постепено, а ќе бидат испорачани од август 2026 до 2028 година“ истакна министерката.
