Поранешниот министер за економија Крешник Бектеши во емисијата Клан дебата на телевизијата Клан Македонија изјави дека на албанските граѓани им е одземено достоинствено одбележување на Денот на знамето.
„На граѓаните им беше одземен празникот 28 ноември. Ги видовме сликите дека полицијата ја прекинала прославата на Албанците зад Камениот мост. Ние сме овде државотворен народ, 30 проценти сме, а народен празник не може да се забрани. Ниту една држава, па ни најголемите држави не забрануваат вакво нешто, а нашата земја го забранува“, рече Бектеши.
Бектеши додаде дека граѓаните кои славеле континуирано наидуваат на пречки од полицијата.
„Има селективни дејствија. Албанците ги уапсија, малолетно дете доби 8 дена притвор, но на полицаецот кој го фрли албанското знаме на земја не му е изречена дисциплинска мерка, против него не се преземени никакви мерки. Овие институции некому станаа мајка, а некому маќеа“, рече Бектеши.
