Денеска беа погребани членовите на музичката група „ДНК“, кои трагично го загубија животот во пожарот во дискотеката „Пулс“ во Кочани, објави МИА.
Пејачот на бендот, Андреј Ѓорѓиески, беше испратен на последниот починок на градските гробишта во Бутел, додека неговата колешка Сара Пројковска, професорка на Факултетот за музичка уметност, беше погребана на гробиштата во Лисиче. Тапанарот на бендот, Ѓорѓи Ѓорѓиев, најде свој вечен дом на градските гробишта во Струмица.
На погребот на Андреј Ѓорѓиески, кој започна во 10 часот, присуствуваа членови на семејството, негови колеги музичари, уметници и пријатели. Церемонијата за Сара Пројковска, пак, се одржа во 12 часот на гробиштата во Лисиче.
Во Струмица, посмртните останки на Ѓорѓи Ѓорѓиев беа изложени во Градската капела од 12 часот, а во 10 часот неговите колеги од музичкото училиште му оддадоа почит на комеморативна седница.
Во меѓувреме, во црквата во штипско Ново Село беа изложени телата на Филип Стевановски и Александар Коларов, исто така членови на групата, од 9 до 11 часот. Телото на Александар Ефремов, кој беше официјален фотограф на групата, беше изложено во црквата „Света Троица“ во Штип во истото време.
