Одлуката едногласно ја донесоа советниците на денешната вонредна седница. Охрид сочувствува и е солидарен со семејствата на починатите и повредените во оваа голема трагедија и ова е најмалку што во овој момент може да се направи, истакна Грaдоначалникот Пецаков.
Советот на Општина Охрид денеска на вонредна седница едногласно донесе одлука за одобрување на финансиска помош во износ од 1.000.000 денари за семејствата на настраданите и повредените лица во пожарот во Кочани. 55-тата седница започна со едноминутен молк во знак на почит за 59-те загубени млади животи во трагичниот пожар.
Пожарот во дискотеката во Кочани е една од најголемите трагедии кои се случиле во Македонија и изразувам сочувство, солидарност и поддршка не само со семејствата на починатите туку и желба за побрзо оздравување на сите оние кои што беа повредени во пожарот. Охрид како град најмалку што може да направи е оваа финансиска помош која денеска Советот ја изгласа и секако дека не само институционално туку и поединечно според можностите би помогнале во процесите кои понатаму ќе следат, а се потребни за поддршка на градот Кочани.“ – кажа Кирил Пецаков – Градоначалник на Охрид.
Финансиската поддршка е од резервите на општината, а дел во износ од 200 000 ден се обезбедија со пренамена од програмата за култура.
„ Во договор со ИВЗ со која Општина Охрид традиционално организира Ифтарска вечер, се договоривме минатата недела, оваа година да нема организација и дел од средствата кои беа за тоа наменети се пренаменија и се дел од оваа поддршка.“ – кажа Пецаков.
Општина Охрид ќе ја упати финансиската помош на сметката за солидарна помош при Црвениот крст на Македонија. Финансиските средства ќе бидат исплатени од Буџетот на Општина Охрид.
