Изминатиот викенд се одржа Европско првенство во борење за кадети (У-17) во Скопје, а каде штипјанката Андреа Нисева го освои третото место, но наместо под македонско знаме и да ја претставува Македонија, Нисева настапуваше по знамето на Бугарија и го преставување нашиот источен сосед.
Телевизија М Нет испрати прашање до Министерството за спорт, зошто Нисева настапуваше под бугарското знаме, а не под македонското знаме, зошто младата борачка од Штип ја претставување Бугарија, а не Македонија.
Од министерството за спорт добивме одговор дека одлуката под кое знаме ќе настапува еден спортист е лична и ја носи самиот спортист, притоа како што истакнаа од министерството во нивниот одговор дека како институција не може да навлегуваат во личните одлуки на спортистите, но ќе работат да обезбедат подобри услови на спортистите и да нема ситуации кои би ги иницирале спортистите да одлучуваат и да изберат да настапуваат за друга држава.
„Министерството за спорт е запознаено со случајот на младата борачка Андреа Нисева која во изминатиов период, вклучително и на последното Европско првенство за кадети У17 што се одржа во Скопје, настапуваше под знамето на Бугарија. Во спортот, одлуката под кое знаме ќе настапува еден спортист е лична и ја носи самиот спортист, таков избор дозволуваат и правилата на меѓународните спортски федерации. Институциите се должни да создадат функционален и поддржувачки систем што ќе го задржи спортскиот потенцијал во државата. Министерството за спорт работи токму на тоа, да се обезбедат подобри услови за спортистите и да нема ситуации кои би ги иницирале спортистите да одлучуваат и да изберат да настапуваат за друга држава. Како институција не може да навлегуваме во личните одлуки на спортистите, наша должност е да се фокусираме на создавање стабилен спортски систем во кој младите ќе може да напредуваат во сопствената земја. Тоа е наш приоритет – преку подобрена соработка со националните спортски федерации, појасна регулатива да се обезбеди еднаков пристап, поддршка и можности за секој талентиран спортист“, велат од министерството за спорт.
Нисева е млада борачка од Штип која бележи големи резултати на меѓународно поле, а сега се подготвува за настап на Светското првенство во Грција.
