Зошто досега специјалната јавна обвинителка не е осомничена за случајот „Рекет“ и покрај цврстите и уверливо документирани докази против неа, пишува Плусинфо во најновото продолжение за оваа афера.
Порталот прашува зошто освен Бојан Јовановски и Зоран Милевски – Кичеец досега не се осомничени и други лица, како на пример од невладината организација Меѓународен сојуз и личностите што ги подигале спорните уплати како хонорари.
„Втората дилема е какво и колкаво било влијанието на Зоран Заев, на Радмила Шекеринска и на потпретседателката на парламентот Фросина Ременски, три водечки лика во македонската политика, врз успешноста на групата на Бојан Јовановски, во нејзините злосторнички активности… Фросина Ременски и формално е член на раководството на Меѓународен сојуз. За неа велат дека заедно со Мандиќ, била „идеолог“ на програмата на невладината на Боки 13-ка, но и на програмата за пензионерски туризам. Не знам дали е тоа точно, но на настаните на Меѓународен сојуз таа е во преден план, а се истакнува и на некои неформални журки на друштвото.
Неофицијално дознавам дека спомнатата Јасна Мандиќ е интересна личност и таа на некој начин е поврзана со Радмила Шекеринска, заменичката претседател на СДСМ. Веднаш да се разбереме, не инсинуирам баш ништо и не сакам да правам сапуница од пријателска конекција на Мандиќ со сопругот на Шеќеринска, преку трети личности. Пријателствата и дружбите се нормална работа и не се ниту криминал ниту злоупотреба, сами по себе. Настрана фактот што Марија Јанковска, една од основачките на Меѓународен сојуз, ѝ е јатрва на Шекеринска. И тоа може да е само обична коинциденција. Но со оглед на невеселите околности, мислам дека Шекеринска сепак ни должи објаснување дали овие релации можеби придонеле Мандиќ да стане членка на Национално координативно тело за имплементација на Конвенцијата на ООН за правата на лицата со попреченост во Република Северна Македонија“, пишува Плусинфо.
