На Инфективната клина во Скопје се испитува уште еден сомнителен случај на коронавирус, соопшти министерот за здравство Венко Филипче. Се работи за патник од Дубаи, кој пред шест дена дошол во Скопје. Министерот утрово во изјава за медиумите соопшти дека резултатите за овој пациент ќе бидат готови за два до три часа.
„Пред неколку часа е примен еден пациент кој минал шест дена во Дубаи, има симптоми на грип, и за околу 2-3 часа ќе бидат готови резултатите”, рече Филипче.
На Инфективната клиника во Скопје синоќа се изврши тестирање на корона вирус на едно лице со симптоми на грип. Резултатите се негативни, информираат од Министерството за здравство.
„Пациентот има лесна клиничка слика, нема покачена телесна температура и неговата состојба е стабилна. Се работи за лице кое вчера со попладневниот лет од Милано пристигнало во Скопје. Патникот поминал низ термалната камера, која кај него не дијагностицирала симптоматологија на болест. И самиот пациент, првите симптоми ги почувствувал по доаѓањето дома, по што се јавил на Инфективната клиника во Скопје и бил примен во 22 часот. Од неговото пристигнување на клиниката, пациентот бил ставен во изолација“, информираат од Министерството за здравство.
Од вчера Министерството за здравство го подигна степенот на подготвеност на највисоко ниво. Се формира Кризен штаб во рамките на министерството, а на сила стапија и нови зајакнати мерки за превенција од и справување со евентуални заболени од корона вирус.
мкд.мк
