Министерот за здравство Венко Филипче рече дека очекува околу 2.000-2.500 заболени од Ковид 19. Тој и вечерва апелираше граѓаните да бидат дисциплинирани, да не се групираат и строго да се придржуваат до мерките за заштита.
-Очекуваме добри резултати периодов од рестриктивните мерки. Ова е втор изолациски викенд, следниот ќе биде трет, поради што очекуваме да видиме резултати од сето тоа – рече Филипче.
Воедно, тој информира дека Комисијата за заразни болести утре во 8:30 часот на состанок ќе го разгледа барањето за воведување карантин во Куманово.
-Прашање е колку оваа мерка би била ефикасна, со оглед дека околу 4.000 жители на Куманово работат во Скопје и патуваат секој ден – посочи Филипче.
Исто така, министерот истакна дека ако има потреба сите 18 пациенти од инфективното одделение во Куманово ќе бидат префрлени во Скопје, но засега, според него, нема потреба.
