Со речиси изедначен број на мандати во македонскиот блок, ДУИ се смета за одлучувачки фактор за новата коалиција која ќе ја формира идната Влада. Откако Државната изборна комисија ја објави првичната распределба на мандати, Бујар Османи на неговиот фејсбук профил објави дека сите патишта водат кон Мала Речица.
Тој во еден табор ги наведе СДСМ и БЕСА кои имаат 46 пратеници, а во друг табор ги наведе ВМРО-ДПМНЕ и Левица кои исто така заедно имаат 46 пратеници (44+2).
-Ги чекаме официјалните резултати од ДИК, а потоа ќе разговараме со сите, изјави кратко за весникот Вечер, Артан Груби од ДУИ.
Со вечерашното усвојување на заклучокот за конечните изборни резултати, започнаа 48-часовните рокови за приговори за спроведувањето на изборите и за сумирањето на резултатите. На нив ДИК треба да одговори во рок од 72 часа.
