Министерот за здравство, Венко Филипче, на денешната прес конференција истакна дека Комисијата за заразни болести до Владата ќе предложи три нови мерки, за заштита од корона вирусот. Една од мерките, како што истакна министерот, е забрана за масовни собирања во домовите, односно едно семејство ќе може да прими најмногу четворица гости.
Според надлежните, ова не значи дека полицијата ќе шета низ малата и ќе упаѓа во домовите, туку ќе постапува по пријава од соседи или некое друго засегнато лице, односно само тогаш ќе влезе во нечиј дом и ќе ги пребројува гостите.
Бидејќи домот, односно неговата „светост“ е заштитена со Уставот, останува нејасно како полицијата ќе ја реализира оваа мерка, без да го наруши правото на приватност.
Адвокатот Јанаки Митровски вели дека оваа мерка не може да се спроведе, односно не е во согласност со Уставот.
-Домот и неговата приватност се светост во секоја држава па и нашата. Неповредливоста на домот е Уставна категорија и таа заштита е предвидена со член 26 од Уставот на РМ. Правото на неповредливост на домот може да биде ограничено единствено со судска одлука кога е во прашање откривање или
спречување, на кривични дела или заштита на здравјето на луѓето.
Одтука не може со законска мерка или одлука на Влада која е хиерархиски под Уставот да се дерогира Уставната заштита, туку единствено со судска одлука или евентуална измена или дополнување на овој член.
Но како што и повеќе пати сме посведочиле, во Македонија се бива. Како ја замислуваат мерката, ќе ми влегуваат дома без наредба за претрес и ќе ме бројат?, изјави адвокатот Митровски за ” Фокус”.
Тој додава дека оваа мерка е неприменлива во пракса.
-Бидејки постои посебно кривично дело казниво по член 206 Непостапување според здравствени проописи за време на епидемија, како исклучок полицијата има право да влезе во дом без наредба поради постоење на основано сомнение дека во моментот се врши кривично дело, имено кршење на прописите за време на епидемија. Но, нема ни теоретски шанси полицијата да знае однапред колку лица има внатре и затоа оваа мерка е неприменлива во пракса, или барем неприменлива без кршење на Уставните одредби, вели адвокатот.
Останува да се почека дали Владата ќе ја прифати предложената мерка.
Валентина Вурмо Извор: Фокус
