Бојко: Греота е Македонија да не влезе во ЕУ заради Гоце Делчев, затоа барам компромис до ноември.

Ќе биде грев пред историјата ако Бугарија и Македонија не најдат решение – без политички игри затоа што и светот нема да не разбере. Ова е пораката од бугарскиот премиер Бојко Борисов до македонската влада.

По цел месец закани во вид на пораки, изјави и натегања за средби на политичко ниво, Борисов денеска во Софија го пречека шефот на македонската дипломатија Бујар Османи и му кажа дека Македонија ја чека уште многу работа.

Борисов бара компромисно решение меѓу Скопје и Софија да има до 10 ноември, датумот кога ќе се одржи Берлински процес а на кој копретседавачи се Македонија и Бугарија.

– Вашите граѓани треба да знаат дека во Бугарија имате и сте имале најголема поддршка и дека ние само треба да ја направиме историјата мост на пријателството и блискоста, а не скршен мост на кој Република Северна Македонија не може да помине. Значи тука не треба да има политички игри. – изјави Борисов.

Остра во изјавите и шефицата на бугарската дипломатија, Екатерина Захариева. На прашањето за Бугарскиот Меморандум и оспорувањето на македонскиот јазик , таа одговори дека Македонија треба да ги признае историските реалности, поврзани со процесот на создавање на новиот национален идентитет.

– Навистина сум зачудена што овој меморандум се доживува како нешто изненадувачко. Немаме ништо против македонските граѓани да се самоопределат како сакаат. Имаме договор во кој има клаузула за јазикот и сакаме така да се третира. Немаме никакви нови претензии. Апелирам и се надевам да не се создаваат проблеми таму каде што ги нема. – изјави Захариева.

Бујар Османи порача да не се загрозува сегашноста, а двете страни, македонската и бугарската да и дадат шанса на иднината.

– Правото на самопределување и самоизјаснување е современо европско право кое лежи во фуднаменталните вредности на самата унија и не може да се решава со билатерални договори ниту пак сметам дека треба да создадеме клима дека некој ни го спори тоа. – изјави Османи.

Денеска се потврди и датумот за средба на историчарите. На 15 и 16ти октомври Комисијата за историски прашања ќе седне на маса да ја продолжи работата, а веќе е јасно дека Делчев е спорната историска личност за која ниту една од двете страни засега не попушта.

Денешната Посетата на шефот на македонската дипломатија е само претходница на средбата меѓу Заев и Борисов, додека во исто време во ЕУ се водат интензивни дебати за консензус за преговарачката рамка на ЕК, за која Бугарија има доставено забелешки.

 

ОСТАВИ КОМЕНТАР

Please enter your comment!
Please enter your name here