Амбулантното возило за кое директорот на струмичката болница Наќе Гогов бараше донации предизвика доста реакции меѓу јавноста. Имаше секакви коментари меѓу кои најгласни беа тие дека нема амбулантни возила додека се вози мерцедесот за кој Гордана Јанкуловска и Ѓоко Поповски завршија во затвор, а екс-премиерот Никола Груевски се спаси со бегство. Премиерот Зоран Заев за ТВ 21 изјави дека мерцедесот сега може да се вештачи и потоа да се продаде.
„После пресудата на Врховен суд предметот е завршен и сега може да се направи вештачење колку пари би можел да се продаде и да се направи одлука согласно тоа, што да се прави со него“, вели премиерот Зоран Заев за ТВ21.
Владата веќе имаше донесено одлука за негова продажба, но бидејќи тогаш беше во тек и судскиот предмет „Тенк“, истата беше повлечена бидејќи истиот беше материјален доказ.
