Вицепремиерот за борба против корупција Љупчо Николовски вечерва е на терен со инспекторите од Државниот пазарен инспекторат кои вршат контроли за доследно почитување на протоколите во борбата против ширење на пандемијата.
„Вечерва имав чест и лично да ги запознаам дел од луѓето, коишто овие девет месеци имаат значаен придонес во спречувањето на ширењето на вирусот КОВИД 19 – инспекторите од Државниот пазарен инспекторат. Инспекциските служби се важен контролен механизам за правилно спроведување на секоја уредба, одлука, протокол и мерка, што ги преземаме за спречување на ширење на коронавирусот. Овие луѓе, кои деноноќно се на терен и работат со полн капацитет, се една од клучните алки во спречувањето на ширење на вирусот“, сподели Николовски.
Вицепремиерот уште еднаш потсети да покажеме колективна одговорност, да ги почитуваме мерките и протоколите, бидејќи, како што рече, со тоа ќе им помогнеме и на инспекторите, на здравствените работници и на сите кои овие девет месец водат битка со коронавирусот.
„Оваа поддршка е потребна повеќе од било кога. Само заеднички, со колективна одговорност, ќе успееме да го спречиме ширењето на коронавирусот и да ја пребродиме оваа здравствена криза“, порача Николовски.
