На денешен ден пред 20 години македонските безбедносни сили го ослободија Тетовско кале од припадниците на ОНА, завземајќи ги нивните борбени позиции, потсети денеска Стојанче Ангелов, лидер на партијата Достоинство и учесник во воената 2001 година како борец и полициски генерал. Ангелов рече дека Достоинство предлага овој ден да биде прогласен како Ден на македонските бранители и да се одбележува со собири секоја година во интерес на мирот и соживотот во земјава.
Ангелов нагласи дека станува збор за прва чиста воена победа за време на тогашниот вооружен конфликт, со комбинирана воено – полициска акција.
„Како тогашен командант на единица бев првиот што се искачив на Тетовското кале, таму затекнавме повеќе тешки митралези со кои беше стрелано врз нас, потоа автоматско оружје, рачни фрлачи, гранати, рачни бомби и друга опрема”, рече тој, кој со свои соборци го посети местото од кое тогаш се повлекоа силите на ОНА.
Ангелов рече дека Достоинство предлага овој ден да биде прогласен како Ден на македонските бранители и да се одбележува со собири секоја година.
Пораката ќе биде не да се враќаме во минатото туку да одбележуваме за да не се повтори и да градиме мир и соживот, нагласи Ангелов.
Тој рече дека треба да се води сметка и да не се прифати барањето на Алијанса за Албанците и на Алтернатива за лесно добивање на државјанство со само тројца сведоци, бидејќи тоа може да нанесе штета, не само во однос на етнички баланс, туку и заради заканите дека со амандмани ќе блокираат битни економски закони за граѓаните.
Ангелов апелира и до организаторите на евентуални идни протести заради осудителните пресуди за обвинетите во предметот Монструм, да нема воинствена реторика на меѓуетнички план и да не дозволат инфилтрација на некогашни структури на УЧК кои имаат други цели – насочени против стабилноста и соживотот.
Лидерот на Достоинство ги повика граѓаните и дијаспората масовно да се регистрираат на пописот и да не дозволат, како што рече, тоа што беше брането во 2001 година со оружје преку бојкот на статистичката операција да биде загрозено.
mkd.mk
